VISIE
Ons liefde, leiding en omgee bied sekuriteit, vastigheid en positiwiteit vir ‘n beter toekoms.

MISSIE
Gedring deur ons hemelse opdrag, verbind Bright Lights Kinderhuis Pofadder hom tot omvattende ondersteuning, versorging en ontwikkeling aan sorgbehoewende, wetsbestede kinders, wie hulp benodig. Ons doen dit deur goed opgeleide personeel, in samewerking met ander belangrike rolspelers in die sorgbehoewende kind se lewe en in die gemeenskap.

FONDSINSAMELINGSNO. 011-891

INLEIDING
Die kinderhuis op Pofadder het in 1936 tot stand gekom toe die plaaslike leraar die oorpronklike geboue met tweedehandse material opgerig het. Die oorspronklike geboue was baie primitief en kon slegs 20 – 30 kinders huisves.

Die gemeenskap van Pofadder is geleë in die provinsie van die Noord-Kaap. Die inwonertal is ± 6000 waarvan 70% werkloos is. ‘n Groot aantal inwoners is afhanklik van staatspensioene vir oorlewing.

In 1938 is die kinderhuis amptelik by die regering as ‘n kinderhuis geregistreer sodat dit sorgbehoewende wetsbestede kinders kan opneem en ‘n staatsubsidie kan ontvang.

Die kinderhuis het oor die jare gegroei tot ‘n inrigting wat 132 kinders van beide geslagte kan akkommodeer. Sedert 1999 het die getalle afgeneem na ± 120.

Die opname beleid van die staat het oor die jare verander. Aanvanklik is kinders van die plase uit die omgewing gehuisves sodat hulle kon skoolgaan; later is verwaar-loosde kinders uit die omgewing opgeneem; ‘n derde fase was die opname van kinders van oor die hele Suid-Afrika. Tans is die beleid van die staat sodat slegs kinders uit die provinsie opgeneem mag word. Waar nood egter ondervind word, word alternatiewe reëlings vir toelating gemaak.

KINDERS VAN BRIGHT LIGHTS POFADDER
Kinders van Bright Lights Kinderhuis Pofadder is almal om die een of ander rede wetsbestee of sorgbehoewend verklaar. Die redes hiervoor is: Weesheid, Verwaarlosing deur ouers, Skoolversuim van die kind, seksuele molestering, betrokkenheid by misdaad of mislikte pleegsorg.

Hulle ouderdomme wissel van 06 – 19 jaar. Tans huisves Bright Lights Kinderhuis Pofadder, 72 seuns en 60 dogters. Kinders ouer as 18 jaar kry ook die geleentheid om langer te bly totdat hulle selfs matriek voltooi het. Tans huisves ons twee gesinne jonger as 06 jaar.

OPVOEDING EN OPLEIDING
Kinders gaan skool by die plaaslike laer- en hoërskool waar hulle, hulle skool-opvoeding tot graad 12 kan afhandel. Asgevolg van die kinders se traumatiese lewens vorder sommige kinders nie akademies baie goed nie. Hulle is oorwegend heelwat ouer as wat die norm vir die betrokke graad is.

Die kinderhuis het oor die jare naas die formele skool kurrikulum ‘n eie ontwikkel-ingsprogram van opleiding vir die kinders. Die opleiding sluit in: Sweiswerk en Tuinbou vir die seuns en Huishoudkunde, naaldwerk en blommerangskikking vir die dogters. Voedselvoorsiening word deur die huishoudkunde aan privaatorganisasies beskikbaar gestel. Personeellede beskik oor wye bekwaamhede en word klasse deur hulle aangebied omdat finansies ontbreek. “Ballroomdancing, Breakdance, Gumbootdancing” en tamboernooientjies word op kulturelende wyse aangebied deur vrywilligers vanuit die gemeenskap.

Sommige kinders kry ook geleentheid om ervaring met kantooradministrasie op te doen as hulle personeel help om nuwe leêrs op te maak of data op die rekenaar vas te lê.

SPORT EN KULTUUR
Kinders neem gereeld deel aan skolesport.

Die kinders het die afgelope jare ‘n eie kulturele program. Dit sluit ‘n gospelgroep in. Hierdie groep onderneem tydens skoolvakansies gereeld toere na verskillende dele van ons land waar hulle aan plaaslike gemeenskappe optree. Hulle het reeds 3 (drie) CD’s van hulle musiek opgeneem.

Tydens toere besoek die groep sovêr moontlik natuur- en ander besieningswaardig-hede. Vir hierdie kinders is besoeke aan die see, museums en ander plekke van historiese- of kultuurbelang ‘n geweldige ondervinding omdat hulle ouers nooit self hierdie geleenthede kan bekostig of vir die kind kan gee nie.

VAKANSIE-OUERS
Die kinderhuis plaas sovêr moontlik kinders tydens die winter- en somervakansies by vakansie-ouers of familie om gesinshereniging te bevorder. Jaarliks bied die kinder-huis ook ‘n Gesinsherenigingsnaweek aan om ouers en familie-lede met hulle gesinne te probeer herenig. Tydens hierdie naweek word selfs speletjies aangebied waarby die hele gesin betrek word.

Baie sorgbehoewende kinders weet asgevolg van ‘n geskiedenis van mishandeling nie altyd hoe om in gesinsverband op te tree nie. Hulle kan aggressief optree of sukkel om in ‘n vreemde gesinstruktuur in te pas.

Vakansie-ouers lewer hierdie diens as vrywilligers en doen werklik baie moeite om die kinders tuis te laat voel. Dis opmerklik dat kinders wie by vakansie-ouers tuis was met padkos terug kom terwyl kinders wie by hul ouers of familie tuis was geen sakgeld of padkos terug kry nie.

FASILITEITE
Die geboue kompleks is baie oud en het voorheen as ‘n koshuis gedien. Die gevolg is kinders slaap in semi-slaapsale met redelik min privaatheid. Die slaapsale huisves 7 -14 kinders. Huidiglik het ons dan ook oorgeskakel na die “Cottage-stelsel” om kinders die gevoel van omgee te laat ervaar. Hierdie stelsel is nog in ‘n proef-stadium en ontbreek ameubliment, soos TV’s, wasmasjiene, beddegoed, breekware, eetgerei en mooi portrette.

Daar is geen luukse geriewe soos lugversorgers vir die skroeiende somers en verwarmers vir die yskoue winters nie.

Die kombuis en administrasie kantore het slegs die heel basiese geriewe en toerusting.

STAATS FINANSIERING
Staatsfinansiering is in 1994 bevries en sedertdien betaal die staat slegs R1000-00 per kind per maand aan die kinderhuis. Hierdie subsidie hang verder af van hoe die kind se beweging in die maand is en wanneer die kind by die kinderhuis aansluit.

Tans is die staatsfinansiering slegs 50.8% van die totale begroting van die kinderhuis. Die kinderhuis moet eie bronne ontwikkel om dienste aan die gang te hou. Die gevolg is dat instandhouding en personeelsalarisse nie aan aanvaarde normes voldoen nie. Huidiglik is ons geboue in sodanige toestand dat nood herstel-werk aan geboue gedoen moet word. Dit is egter baie duidelik dat fondse meeste van tyd ontbreek en herstelwerk nie gedoen word nie. Personeel moet dan ook noodgedwonge self die herstelwerk hanteer omdat fondse vir die betaling van geskoolde arbeiders ontbreek.

EIE FINANSIERING
Die kinderhuis is verantwoordelik om jaarliks 49.2% van sy totale begroting in te samel om slegs aan die basiese behoeftes te voldoen.

Vir enige uitbreiding, instandhouding of vervanging van toerusting moet ekstra fondse gewerf word.

Die kinderhuis se gospelgroep tree op en samel jaarliks 15% van die totale begroting in. Die optredes van die gospelgroep genereer ook bykomende voedsel en goeie tweedehandse klerasie en skoene.

Die kinderhuis bied ook hul jaarlikse gholfdag op Aggeneys aan en word gholfspelers sover as Victoria-Wes, Carnarvon, Upington, Kleinzee, Nababeep, Springbok, Keimoes en Kenhardt betrek.

Die kinderhuis nader ook gereeld kerke, sake-ondernemings, ens., om fondse te bekom.

BESNOEIINGS
Om te bespaar het die kinderhuis oor die jare die volgende gedoen om hulle deure vir behoeftige kinders op te hou.

* Personeel is van 27 tot 17 verminder
* Inkorting van sekere kossoorte; varsmelk, vrugte, hawermout, graanvlokkies, varsvis en sekere vleissoorte word glad nie verder aangekoop nie.
* Inkorting van klerasie: Slegs skool- en onderklere kan aangekoop word. Kerkklere word gekoop na behoefte en wanneer kinders nuwe lidmate van die kerk word.

GEMEENSKAPSBETROKKENHEID
Aangesien die gemeenskap van Pofadder baie arm is lewer die maatskaplike werker van die kinderhuis sover moontlik dienste kosteloos in die gemeenskap. Self is die gemeenskap so verarm en kan hulle slegs ‘n bydrae lewer deur goedkoop arbied.

BESTUUR EN PERSONEEL VAN DIE KINDERHUIS

BESTUUR
Die kinderhuis het ‘n plaaslike bestuur van 16 persone wat verteenwoordigers van die Kerkrade van die plaaslike V.G.Kerk, N.G.Kerk, R.K.Kerk, Christengemeente, Vroue-verenigings van genoemde kerke en die plaaslike skole insluit.

Die bestuur is: Mnr. I. Basson (voorsitter), Mnr, N. Klaassen (o/voorsitter), Mé. S. Gribble (sekretaresse), Mé. P. Hendriks (boekhouer), Mé. C. Gertse (supervisor), Mnr. D. de Wet (bestuurder), Me. G. Schamboua, Mé, W. Truter, Mé. C. Diergaardt, Mé. L. Klaaste, Ds. A. Verwey, Ds. J. Hendriks, Mnr. N. Klein, Mnr. D. van Reenen, Mnr. J. Saul en Mnr. K. Lewies.

Die bestuur bepaal die beleid, stel die personeel aan, hou toesig oor die program en bestuur die finansies.

Die kinderhuis is ‘n projek van BADISA, ‘n gesamentlike bedieningsaksie van die V.G.Kerk (Kaapland) en N.G.Kerk (Wes- en Suidkaap). BADISA lewer oorhoofse dienste aan die kinderhuis.

PERSONEEL
Die personeel van die kinderhuis is: Die Hoof (Mnr.D. de Wet), Maatskaplike Werker (Mé. S. Gribble), Boekhouer (Mé. P. Hendriks), Administratiewe Beampte (Mé. M. Klaassen), Voedseldiensbestuurder (Mé. S. Hendriks), Twee Kokke, Agt Kinderver-sorgers en Twee Klereversorgers.

KOSTE VERBONDE AAN VERSORGING VAN EEN KIND
* Voedsel R 615-00
* Klerasie 379-00
* Toiletware 223-00
* Onderwys & Ontspanning 399-00
* Sakgeld & Kerkgeld 254-00
* Totaal R1870-00

DRINGENDE BEHOEFTES VAN BRIGHT LIGHTS POFADDER
* Die kinderhuis op Pofadder het vele tekortkomings omdat die staat geen verhogings in subsidies na die aanpassing tot R1000-00 gemaak het nie. Jaarliks styg kostes en dan mos vanselfsprekend ook die kostes van kinderhuise styg. Toelaes vir kinderhuise bly egter onveranderd en is daar steeds nie lig vir die toekoms nie. Soos reeds genoem is die toelae per kind R1000-00 terwyl die onkostes per kind per maand reeds ± R1 900-00 beloop.
Hierdie bedrag word elke maand benodig en sluit dit kostes soos voertuig-onderhoud, instandhouding van geboue, munisipale-dienste, sport en rekreasie, ontspanning en uitstappies uit. Salarisse soos deur department arbeid verwag; en nog veel meer.

Contact:
The Chairman
Mnr I. Basson
Bright Lights Pofadder
P.O. Box 125,
8890 POFADDER

Tel. 054 - 933 0060
Fax. 054 - 933 0237
Cell. 082 5492714
E-mail: brightlights@telkomsa.net